經典足球動漫《足球小將》，陪伴過唔少人成長，當年唔知有幾多細路學戴志偉玩倒掛金勾躂到攤攤腰。除咗風靡港台日，喺歐美及拉丁美洲等足球大國都有唔少人氣。幾年前智利公營電視台TVN播《足球小將》，就因為當中有段「三杉淳打女人」情節，而被當地審查團體告劇情涉及「性別暴力」。

段爭議情節係講緊，由於球隊女經理彌生將三杉淳患有心臟病嘅事話畀戴志偉知，希望戴志偉會特登踢輸比賽。三杉淳知道後就好嬲，鬧彌生同時打咗佢一巴。

喺2020年2月智利法庭判電視台需罰款511萬智利披索（約5.42萬港元），其後電視台提出上訴，最終上訴得直推翩判決，唔使罰錢。法官認為足球小將並非鼓吹性別暴力，只係講緊一班鐘意足球嘅小朋友追夢，而三杉淳打彌生唔係因為佢係女人，係因為私隱被洩露，睇嚟法官真係有睇過足球小將。