每當熱氣或食完洋葱、蒜等重口味食物，都有機會導致「口臭」。有時候聞唔到自己有口氣又或者鼻塞，直到同人傾計嗰陣發現佢面有難色又慢慢同你拉開距離先知咩事，就非常尷尬。日本公司THANKO就推出「口氣檢測原子筆」，等大家可以見客或見女神之前Check下口氣，確保唔會留低壞印象畀人。

THANKO之前都出過口氣檢測機，但仲大支過探熱槍，非常唔方便隨身攜帶，今次將口氣檢測裝置縮細到可以塞入一支原子筆，方便帶出街之餘又低調，平時又可以當普通原子筆用。

用家只要對住支筆吹氣，就會即時顯示口氣等級，總共分為0-4五個等級（愈高愈臭）。檢測筆充電都非常方便，只要扭開筆頭插條USB線就OK，官方聲稱全次充滿電可以用120次左右。但支筆個檢測芯有壽命，每支大約可以用2000次，用完就要買新替換。

至於背後運作原理係咩官方就無詳細介紹，但見到規格個到寫住檢測目標係硫化氫及甲基硫醇，反正就係口氣主要成份，應該唔係是旦整支筆出嚟再隨機比個數字你咁兒戲嘅。支口氣檢測筆售價為¥2,980日元（約$220港幣），而替換芯就賣¥220日元（約$16港幣）兩支。雖然依家個個載口罩，好似無用武之地，有口氣最多臭死自己，但做人要展將來，係咪先！