睇開「頭文字D」，相信你都會幻想自己係拓海，然後喺秋名山挑戰五連髮夾彎。不過身處香港嘅你，又點可能喺馬路咁樣飄移法呢? 不過有人真係嘗試發下夢，雖然唔可以真實咁喺香港賽車飄移，但就成功實現電子化。

由本地賽車及電競運動團隊Plutonization共同合作下，近日成功創作出第一條100%還原香港實境模擬山路賽道 - 大帽山賽道。今次創作團隊創作嘅大帽山賽道對照香港真實路段嘅地貌及環境製作而成，由實地考察至繪圖、調整等，成個創作花了咗接近半年時間先完成。就算您唔識揸車，又或者係假日司機，您都可以透過模擬器入面嘅大帽山賽道，享受喺香港揸快車、飄移嘅樂趣。

目前大帽山虛擬山路賽道已經上載至著名賽車遊戲《Assetto Corsa》，即日起玩家只需要到創作團隊網站參照說明下載相關賽道，就可以喺《Assetto Corsa》遊戲內試玩呢條賽道。

而唔單止咁，由即日起日至3月6日，玩家可於《Assetto Corsa》線上伺服器參加「Shell 虛擬山路競速大賽2021」選拔賽。期間玩家會以指定嘅賽車出戰，並可以無限次挑戰賽道，最後會以最快嘅成績作為計算從而獲得決賽資格，最後排名最高嘅16位玩家將會入選3月14日決賽，並以一對一形式進行淘汰賽，決出誰是「大帽山之王」！