早排同大家介紹過日本大阪有間商務酒店推出劈價大酬賓，一晚房租HK$30、月租都只係HK$1800，係咪好吸引呢？而最新又有另一間酒店推出類似優惠，而且係位於東京新宿站附近，大家未住過都一定聽過、未聽過都一定有經過嘅京王廣場酒店。

圖片：keioplaza.co.jp

京王廣場酒店位於新宿站與JR都廳前站之間，乃係地點方便、每晚千幾銀起跳嘅高級酒店，而佢哋最新推出嘅「暮らす@theHOTEL」優惠，就容許住客以21萬Yen，即係大約港紙萬六銀左右連續租住30晚，而且包早餐、車位、酒店Lounge每日兩杯飲品、每日使用酒店會議室兩小時、仲有每星期兩次房間清潔服務等。而且間房唔係豆潤咁大，而係面積23.5平方米嘅正常酒店房，你仲可以加錢升級做大房添！

圖片：keioplaza.co.jp

一個月一間房萬六銀就算以東京標準黎講都唔算平，但當你考慮到佢間房可以住兩個人、兼且包哂燈油火蠟，計落亦可能係除笨有精。