為國民身心健康著想，中國一向對青少年沉迷打機行為絕不手軟。上年先推出有關限定，防止未成人玩家喺晚上10點至朝早8點打機。可惜道高一尺，魔高一丈，唔少小朋友透過假身份註冊遊戲帳戶成功避開限制，每晚依然可以爽爽地打機。

根據中國媒體報導，騰訊最近註冊咗一項名為「防沉迷方法、裝置、服務器和存儲介質」嘅專利，有意透過位置信息嚟判斷玩家有冇沉迷打機，解決青少年用假身份開帳問題。

據了解，騰訊呢個發明可以獲取遊戲當前位置信息，再透過位置信息定位玩家所在地方，如果玩家所在區域正處於「防沉迷時段」，就會唔畀你玩。照咁睇，如果第時將學校同辦公室嘅上班時段例為「防沉迷時段」，咁樣大家就唔使諗住可以返工返學嗰陣偷打機啦。