大家仲記得PS5推出時嘅宣傳片中有一隻叫《Hogwarts Legacy》、以《哈利波特》世界為藍本嘅開放世界動作RPG嗎？以《哈》系列嘅人氣、可以自由「生活」於魔法世界中，令佢成為PS5玩家最期待嘅遊戲之一。雖然目前未知呢個魔法世界究竟會係點，但就可以肯定係一個政治正確嘅世界，因為據《Bloomberg》最新報導，遊戲容許玩家扮演跨性別角色。

雖然任何可以自創人物嘅遊戲，都會有男玩家用女角、女玩家用男角嘅情況出現，不過《Hogwarts Legacy》就更進一步，容許玩家自由選擇角色身形及身體特徵、選擇使用男性或女性聲效，甚至可以選擇被稱為巫師 (Wizard)、或者女巫 (Witch)、先生或者女士，就連個角色係住男生宿舍定女生宿舍都可以自由選擇，即係一個男人身、男人聲嘅角色可以被稱為「女巫」並住入女生宿舍、一個女人身女人聲嘅角色又可以話自己係巫師住入男生宿舍，換言之隻Game基本上係抹去咗傳統性別設定。

圖中可能係兩位「女」同學

圖片：IGN

根據遊戲玩家嘅貪玩心態 (或者獵奇啦下) ，如果以上消息屬實，可以肯定唔少玩家一定會想盡辦法創造出最令人「驚喜」嘅角色。更有趣嘅係《哈》作者JK Rowling去年就係因為「恐跨」發言而遭到一眾「哈迷」唾罵，甚至連遊戲官網都要特登寫明JK Rowling冇份參與製作以避免影響。咁呢個最新嘅「跨性別角色」設定究竟係政治正確，定係亡羊補牢呢？