相信每一個男人，細個嗰陣都有諗過自己砌完嘅高達除咗擺，仲可以拎嚟同人「挑機」。雖然過往就有動畫《Gundam Build Fighters》實現過相關幻想，但係動畫梗係好似差啲野，唔夠真、未到肉。最近日本日昇動畫公司宣布，將推出真人版劇集《Gundam Build Real》，一班演員一齊砌高達，再透過AR技術同其他人實現「GUNPLA對戰」。

故事述主角「ヒロ」從小學時期就同朋友組成戰隊「ブライト」，但由於幾年前喺一場比賽唔見咗隻GUNPLA，所以大家互相猜忌，戰隊最終被迫解散。四年後已經成為高中生嘅佢哋，機緣巧合下重組「ブライト」，並決心挑戰全國大賽，一齊追夢。

據官方資料顯示，《Gundam Build Real》將延續動畫《Gundam Build Fighters》設定，入嘅嘅角色需要自己砌一部GUNPLA，再同其他人對戰。當砌完隻GUNPLA後，再透過掃瞄器掃瞄，電腦就會根據隻GUNPLA嘅製作技術（組裝、塗裝、武器改造）決定機體嘅「攻擊力」、「防禦力」及「必殺技」，再由無人機透過AR技術投影大型GUNPLA畀角色操作同其他人對戰。

雖然預告片並無顯示究竟係點樣AR、點樣決戰，但節目將於3月29日喺Gundam官方Youtube Channel推出，大家耐心等多10日左右就知實際會點打！