隨住EVA電影《新·福音戰士劇場版:||》上映熱潮，最近日本NHK電視台記錄片節目「プロフェッショナル」播出《庵野秀明特輯》，長達75分鐘嘅記錄片入面記錄咗導演庵野秀明呢4年嚟製作嘅經歷，當中庵野秀明更喺節目入面大爆曾經因為粉絲謾罵而兩次瀕臨自殺邊緣。

（圖片截自：NHK）

日本NHK電視台節目「プロフェッショナル」，係一個專拍各行各業唔同專業人士嘅記錄片節目。隨住EVA熱潮，NHK就喺3月22日推出《庵野秀明特輯》，影片一開頭就係影住庵野秀明突然「暴走」，完全無理會到攝製隊感受，一味拎住部電話邊跑邊唔知錄緊咩，旁白就話「當初知道EVA就嚟完結所以去採訪庵野秀明，點知就此展開一場痛苦之旅，連續拍咗4年，係有史以嚟最長嘅一次」，下一句就話「我們唔應該同呢個男人接觸！」，十分搞笑。更有日本網民話本來個節目應該係拍攝庵野秀明辛苦工作嘅情況，點知變成庵野秀明「玩」咗攝製隊4年嘅記錄片。例如庵野秀明叫攝製隊幫手「度橋」，就算落緊雨都叫攝製隊出門拍一段。

（圖片截自：NHK）

又或者係庵野秀明呢種「跳脫」嘅性格，所以EVA先有今時今時嘅成就。庵野秀明喺節目入面分享咗唔少佢嘅人生觀、待人接物態度同埋創作嘅心路歷程。最令人深刻嘅一幕係提到電視動畫版EVA結局（成班人拍住手對碇真嗣講恭喜你個個原版結局）播出後備受爭議，大部份人不滿結局而鬧爆庵野秀明。

（圖片截自：NHK）

對此，庵野秀明表示「我只係希望為世上鍾意動畫嘅人，努力製作更多動畫，但結局播出後喺網絡上開始有人討論點樣殺我，大家議論紛紛討論用咩方法殺我好。當時我就覺得，我都係唔再做動畫算啦。」除咗見到網民謾罵而熱情磨滅，更表示曾經兩次瀕臨自殺邊緣「我曾經諗過跳軌自殺，又有一次打算喺公司左台跳樓自殺。」

（圖片截自：NHK）

其後記者追問最後點解會打消自殺念頭，庵野秀明就畀咗個哭笑不得嘅回答「因為覺得會好痛，我覺得死無所謂，只係唔想死之前好痛，所以就算。」最後庵野秀明表示多得鈴木敏夫嘅支持，佢先可以重新振作。

【庵野秀明SP】

ツイッター上で、大勢の方から反響をいただきました。ありがとうございます。

で「見られなかった」とおっしゃる方。配信サービス #NHKプラス っていうのがありまして。登録が必要なんですが、29（月）の夜までご覧いただけます。よろしくお願いします。https://t.co/qyWz2NMUcI

— NHK広報局 (@NHK_PR) March 23, 2021

如果大家有興趣睇足本版，現時NHK有提供節目重播，不過就無字幕同日本地區先睇到，但我知道大家會自己搵方法㗎啦。

資料來源：huffingtonpos.jp、NHK