隨住疫苗出現，各國嘅疫情似乎都有逐步降溫嘅跡象，而過去一年飽受影響嘅電影業亦開始有新動作。Disney及Warner Bros就先後公佈咗未來嘅放映計劃，從中就可以睇到出佢哋對於前景嘅信心啦。

首先係Disney於昨日公佈最新嘅上映計劃，最著目嘅當然係《Black Widow》又又又又一次延期，由5月7日延到7月9日，而且係院線及Disney+同步上映，而由於《Black Widow》延期，原定7月上映嘅另一部Marvel電影《Shang Chi》亦會延期到9月；源自《101班點狗》、由Emma Stone主演嘅《Cruella》上映日期不變 (5月28日)，但同樣改為Disney+同步上映；Pixar 年度新作《Luca》定於6月18日，Disney+ 限定上映。

換言之，Disney今年嘅電影中，就只剩《Shang Chi》以及《The King's Man》等由20th Century Fox「繼承」嘅電影 (簡單啲講，唔係親生仔)會作「院線限定」上映，似乎就代表Disney對於今年票房嘅期望依然低落。

另一邊廂，上年高調宣佈2021年所有電影都會線上線下同步放映嘅Warner Bros (WB)，就已經將目光放到2022年。全球最大院線之一Cineworld近日計劃重開旗下「Regal」院線，首先會喺4月2日開始有限度上映WB嘅《Godzilla Vs Kong》，同時亦宣佈Regal院線喺2022年會繼續上映WB發行嘅電影，並有45日「院線限定保護」，即係套戲於院線上45日之後先會放上串流平台。

換言之就係WB貌似會遵守緊當日「2021年線上線下同步上映係為期一年試驗」嘅承諾，2022年啲戲會回歸疫情前「先院線後串流」嘅慣例。某程度上代表WB對2022年嘅票房都係樂觀嘅——遲啲反唔反口就唔知啦。