作為一個合格嘅貓奴，幫主子鏟屎、餵到佢肥肥白白只係基本要求，更重要嘅係確保主子活得健康快樂，而了解主子身體情況嘅其中一個方法，就係去睇佢嘅大小二便是否健康。問題係玩屎玩尿的確唔係一件賞心樂事，所以日本最近就有隻「變色貓砂」能夠協助各位貓奴一眼睇清主子嘅健康狀態啦。

圖片：截圖自signyal.jp

首先養開貓嘅人都應該知道，泌尿系統疾病乃係主子們最易患上嘅重症，但由於好多時肉眼係睇唔到主子嘅尿尿有冇問題，所以好多時都係主子出現其他病徵先會發現。而呢款「Signyal」貓砂嘅特別之處，就係會好似中學玩嘅「石蕊試紙」咁，遇到不同物質就會變唔同色。如果主子嘅小便正常就係黃色，偏鹼性 (可能係尿結石) 就會變藍色、蛋白過高 (可能與腎功能相關) 就會變綠色、有血就變紅色、膽紅素過高 (可能與肝功能相關) 就會變啡色，奴才們就可以一眼睇到主子嘅身體狀況。

圖片：截圖自signyal.jp

而且官方話「Signyal」貓砂係用天然物料「二氧化矽」製作，對人畜都無害，棄置時亦只需要包好再當一般廢物處置就得。一包為一隻貓用一個月嘅份量，賣2,780Yen，即係大概HK$200左右。特別要留意嘅係佢採用訂閱制，定期會自動送貨上門。唔知香港會唔會有得買呢？

資料來源：signyal.jp