最近日本網上廣傳一張高中生不雅照片，相中有一男一女著住校服做緊一個「不雅」動作，坐喺旁邊食緊薯片嘅「薯片姐姐」亦同時入鏡。其後有消息傳三個人都被踢咗出校，唔少網友就覺得「薯片姐姐」好無辜，隨即喺Twitter發起抗議活動，Hashtag「#ポテチ姉貴の退学に抗議します（#抗議薯片姐姐被退學）」一時之間登上日本Twitter熱搜榜。

老實講，張相就唔係真係咁「不雅」嘅，只係一男一女著住衫做緊一個性交姿勢動作，不過可能正正因為佢哋未夠「不雅」，如果除咗套校服可能唔使搞到咁大獲。因為網民透過校服特徵「起底」，好快就搵到佢哋就讀「武蔵越生高等學校」，其後Twitter上就有人話佢哋三個被人踢咗出校，網民們未Fact Check就隨即發起抗議。不過由於「薯片姐姐」表情太過有趣，或者係咪真係有人踢咗出校，對網民嚟講都唔重要，繼而掀起一波惡搞熱潮「聲援」薯片姐姐。

網友們仲修改咗「武蔵越生高等學校」維基百科上嘅簡介，喺Google地圖上留1星評分。

至於3位究竟有冇被人踢咗出校，據日媒《弁護士ドットコムニュース》報導，校方表示3位學生仍然在學，但因為涉及個人尊嚴及私隱問題無辦法透露更多，並且唔排除會對洩密者採取法律行動。所以大家有時真係唔好跟車太貼，「薯片姐姐」就無被人踢出校啦，但係被惡搞就係真嘅。

資料來源：Twitter、弁護士ドットコムニュース