「跳躍似猛虎飛過，風都吹得破，一聲吼，一聲呼喝，高天都驚破！」唔知大家見到《虎威戰士》呢四隻字嗰陣，係咪都同我一樣，腦入面自動播起林子祥所唱嘅主題曲。作為當年少有又Hit嘅美式卡通，係唔少80後嘅經典回憶，仲記得當時主角把膠劍炒到上天價。近日《哥斯拉大戰金剛》（Godzilla vs. Kong）導演Adam Wingard宣布，將執導《虎威戰士》真人動畫電影，重現經典。

據外媒Deadline獨家報導，80年代經典卡通《虎威戰士》真人動畫電影由《死亡筆記》電影版監製Dan Lin及Roy Lee共同開發。Adam Wingard除咗執導，亦會同Simon Barrett合作改寫劇本。

導演表示唔想拍到好似《貓》（Cats）咁嘅真人版電影。

其實早於2007年就有消息指華納想翻拍呢套經典卡通，但直到依家先叫做有個雛形。相信大家都擔心會唔會破壞原作，導演Adam Wingard就表示唔想拍到好似《貓》（Cats）咁嘅真人版電影，而係透過CGI技術，令風格更貼近原版嗰種「80年代美學」，等大家睇落就同當年嘅《虎威戰士》一樣。

《虎威戰士》故事講述虎威戰士一族得知母星壽命已盡即將爆炸，就組成太空船團尋找新家園。期間遇到同樣喺霹靂星逃出嘅變種人軍團，結果虎威戰士一族慘遭團滅，剩低幾位年幼嘅虎威戰士能苟存。好不容易去到新行星居住，又發現當地有原住民同變種人軍團等邪惡勢力紮根，從此展開一場正邪大戰。