唔知大家飲啤酒又鍾唔鍾意飲泡呢？對於鍾意飲泡嘅人嚟講，最麻煩莫過於要拎隻杯出嚟倒先飲到。早排日本Asahi就推出新啤酒罐，有別於傳統易拉罐，改成全開口設計，並能夠喺開罐嗰陣自然生成泡沫，同時又可以一滴酒都唔嘥。由於反應熱烈，Asahi喺臨近超市正式發售日（4月20日）先嚟話供不應求，需要暫時停售。大家又嚟睇下呢個罐究竟有幾「把炮」，好賣到要停售。

新設計除咗可以方便飲用，罐內有特殊塗層能夠喺開罐同時自然生成泡沫，而且泡沫濃厚會隨啤酒溫度而變化，溫度低就少啲泡，相反溫度高就會多啲泡。Asahi就建議大家最好係4-8°C飲用，如果高於12°C開罐分分鐘會爆晒所有泡出嚟。

大家可能會擔心個開口會唔會割傷手或者個嘴，從相片可以睇到，罐口邊緣經過特別處理，可以放心飲用。

（圖片截自：ascii.jp）

雖然Asahi依家宣布暫時停售，不過我相信唔使好耐就會出返貨，至於香港幾時會出就未有消息，大家可以留意下Donki或其他賣日本嘢嘅鋪頭會唔會有賣。