由日本漫畫家「諫山創」創作嘅人氣漫畫《進擊的巨人》於今日正式完結，結束長達11年半連載，日本官方網站以及台灣正版翻譯東立電子書城一度癱瘓。至於究竟係爛尾定神作，大家眾說紛紜，呢方面就交畀各位討論（記得唔好劇透）。唯一可以肯定嘅係，「巨人」絕對會成為動漫歷史上重要一頁，感謝諫山老師創作咗一部出色作品。

《進擊的巨人》從2009年10月於講談社漫畫雜誌《別冊少年Magazine》創刊號開始連載，故事講述人類遭到神秘「巨人」攻擊，人類為生存而建立高牆包圍城市，對抗會食人嘅「巨人」，由於對人物角色內心刻劃傳神，深受全球動漫迷歡迎，漫畫單行本全球銷量突破1億冊。經歷11年又7個月，終於喺今日正式迎來最終第139話正式完結。

由於一眾巨人迷都期待喺4月9日凌晨0時準時睇最終話，日本官方網站「マガポケ」人潮汹涌，曾經一度癱瘓，就連發布正版中文翻譯嘅台灣東立電子書城都死埋機，不過現時已經恢復正常。

而動畫版最終季預計於今年冬季正式上線，代表動畫版都會喺今年內劃下完美句號。另外，早幾年華納曾話過會翻拍荷里活真人版電影，並由《小丑回魂》導演Andy Muschietti執導，不過就好似無晒聲氣，並無後續消息，或者今次完結會加速佢哋製作進度。