隨住科技進步，電子遊戲日漸融入生活，無論主機、電腦、甚至連手機都可以打到機，成為大部人消遣方式之一。最近就有班科學家推測未來人類為咗適應遊戲手制，或會進化出超長食指同中指，不過咁樣都未必係一件壞事，大家話係咪先！

連續打機時數統計數據、按年齡層分組。（圖片截自：imelight）

網絡數據公司Limelight於2020年對法國，德國，印度，意大利，日本，新加坡，韓國，英國及美國，共總4500位18歲以上玩家進行調查。結果顯示18-25歲年輕人平均喺一日之內會連續打6.56個鐘機，足足佔咗全日時間嘅3分之1（唔包括睡眠時間），可以見到全球各地沉迷打機情況有幾嚴重。

對此，外國評價網站SlotsWise邀請多位科學家合作，研究如果人類打太多機，手掌會產生咩改變。研究團隊表示人類手掌本身就唔適合使用遊戲手制，為咗更快作出反應同更舒適，或者會進化出超長手指。並以每日打6個鐘機為參數建構出3D模型，展示未來人類手掌嘅可能進化結果。從圖中可以見到，打機常用嘅拇指、食指、中指將會變長，而無名指同尾指因為無用而萎縮。

對於呢個進化推測，相信唔少男士都會覺得係咩壞事（我知你諗咩）。不過隨住VR同AR技術日漸成熟，第時打機可能唔使再用手制，大家又唔使咁擔心隻手會進化嘅。

資料來源：SlotsWise、Limelight