唔知係咩原因，近年多個高級汽車品牌都搖身一變成為地產商，上年就有Aston Martin與英國建築師David Adjaye合作，設計咗五間以Aston Martin為主題、買樓送DBX嘅住宅；今年較早前有Hummer喺加州起咗間屋中可以升部車上黎嘅別墅；最新就有Bentley宣佈會於美國邁阿密起一整棟60層高嘅住宅大樓。

Bentley日前宣佈會與美國發展商Dezer Development以及建築師Sieger Suarez合作，於邁阿密Sunny Isles Beach岸邊起一棟高749尺、共60層、提供200個單位嘅「Bentley Residence」。由於棟樓預計2023年先開始起、2026年先落成，所以目前只有上面一張設計圖，但新聞稿就話入面啲單位會有「Bentley DNA」，而且最大賣點係每個單位都會有個泊到多部車嘅車庫——留意返，個車庫係喺個單位入面，即係你住60樓，你啲車就會泊到上60樓。每個單位都會有拎咗專利嘅汽車升降機——但目前就只係得個名，一切詳情都未知。

撇除同車有關嘅元素，Bentley Residence美國境內最高嘅沙灘岸邊住宅，加上其圓筒型設計，所以每個單位都能夠盡覽邁阿密海景，每個單位亦有私人陽台、泳池、桑拿及戶外浴池，樓下仲有健身室、Spa、威士忌酒吧及餐廳，而且成棟大廈都係用上環保物料建造。