近日於旺角波鞋街The Forest地舖新開左一間新嘅波鞋舖，原來係近年被唔少名人吹捧得好勁嘅潮鞋「大孚飛躍」，究竟呢對鞋係咩來歷而咁受外國歡迎呢?

唔知大家有無留意，較早前於部份意大利、法國嘅時裝週都有一對白布鞋出現喺鎂光燈之下，就咁睇對鞋好鬼似我地以前細個著嘅「白飯魚」，但原來佢卻係外國嘅潮鞋，而事實上呢對鞋竟然係黎自上海的。但係咁究竟點解呢對鞋會喺歐洲等地咁紅呢? 

首先「大孚飛躍」呢對鞋早於1931年就誕生，係由老牌橡膠廠「大孚飛躍」自己生產的，當時基本上係一對極廉價嘅膠鞋，普通到無得再普通嘅鞋，甚至連經少練功嘅少林武僧都會著。到後來在因緣際會下，一名身處國內嘅法國人睇中左呢對膠鞋，並將其海外經營權帶到歐洲，同時將其售價大幅提升，以及做好多包裝、宣傳，特別係標榜呢對鞋係黎自中國及加入少林元素，令外國人非常受落而爆紅。

而就係咁，原來國內嘅「大孚飛躍」亦因此而更受注目，令佢地成為能夠踏入時裝週嘅潮鞋代表。而早前喺銅鑼灣開嘅Pop up Store反應亦唔錯，因此佢地今次正式選址落戶波鞋街The Forest，舖位前身係adidas專門店，唔知佢地又能唔能夠喺無晒旅客，大部份只係得本地客嘅情況下企穩陣腳呢?