由於疫情影響下，世界各地各項長跑賽事都被迫取消，香港亦都唔例外，但同時虛擬跑亦因此應運而生，只要你有一個App就可以同時間在世界唔同地方一齊參加跑步賽事，而一年一度嘅Wings for Life World Run 今年將於跑馬地馬場緩跑徑舉行。

Wings for Life World Run 名義上係一個虛擬跑比賽，但其實背後卻係為慈善的，因為大會會將佢地全數嘅參賽報名費收入用於脊椎損傷研究，目的係希望找尋治癒脊髓損傷嘅方法。而比賽期間，每一位參加者只需要於比賽開始前啟動專用手機APP ，並開啟 GPS 系統，手機 APP 內嘅虛疑搜捕車 Catcher 便會於開賽後 30 分鐘起步，並以時速 14 公里開始追趕跑手，之後每 30 分鐘就會加速 1 公里。開賽 3 個鐘後，呢架代表移動終點線嘅車輛就會每 30 分鐘加速 4 公里，估計應該於開賽大約 4 個鐘之後，即 65 至 70 公里追過最後一名跑手，亦即係今屆賽事冠軍。

而今屆賽事亦再次請來跑山界達人 Hidy Yu 余曉彤參戰，去年參戰嘅佢對賽事感到刺激非常，因此今年再度出戰，而我地MenClub有幸於賽前同佢做左個專訪。

身為越野嘅選手嘅Hidy，其實仲係一名演員，同時又係潛水教練，可以話係百足咁多爪，而佢其實自細已經係一個好動嘅人，讀書嘅時候更熱愛運動加入田徑隊，最終成功搵到自己可以堅持落去嘅項目 – 長跑。到離開校園，因為工作關係跑步次數減少，但機緣巧合下接拍左電視台嘅行山節目，就係咁佢就同跑山結下美好嘅緣份，甚至令佢一個自細嘅夢想實現，講緊嘅就係100KM嘅毅行者。

能夠一直吸引住Hidy跑山嘅原因，可能同好多鍾意跑山嘅你一樣，就係可以近距離接觸大自然，並且可以助佢探索呢個世界，因為跑山令佢可以到唔同國家比賽，開佢嘅眼界，呢一點對於佢黎講係非常珍貴。

當然今次Wings for Life World Run並唔係一個跑山比賽，參賽者以及Hidy都只會於緩跑徑跑，但其實一向跑慣山嘅佢，路跑嘅難度一啲都唔細，佢嘅目標係可以跑到21K，唔知佢最終會唔會成功呢?

不過其實無論結果係點都唔緊要，香港人對虛擬跑呢樣新興賽事嘅認知已經大幅提升，呢樣全靠香港人最強嘅適應力，無論面對點樣嘅困難都可以繼續跑落去，堅持永不放棄！跑手們加油！

Wings for Life World Run 2021

比實日期：5月9日 香港時間晚上7點

地點: 跑馬地馬場緩跑徑