當年《Doctor Strange（奇異博士）》公布選角嗰陣，就有唔少人鬧電影未有忠於原著，將原本係亞裔西藏老人嘅「Ancient One（古一）」法師，交由白人女性演員Tilda Swinton飾演，引發「洗白（Whitewashing）」爭議。事隔5年，近日Marvel CEO Kevin Feige承認當年做錯決定，自作聰明以為咁做好前衛。對於Kevin Feige忽然舊事重提，有粉絲就認為同《尚氣與十環幫傳奇》選角爭議有關，好似間接話畀大家知MCU只係忠於原著。

（圖片截自：IMDB）

根據原著漫畫，「Ancient One（古一）」法師設定為一位年齡超過500歲嘅西藏智慧老人，編劇C. Robert Cargill就曾經暗示過，為咗令電影可以順利喺中國上映，所以先將角色改由白人女性飾演。當年Kevin Feige同導演Scott Derrickson亦有解釋過選角原因，指「Ancient One」只係一個頭銜，並唔係任何一個角色獨有，強調並非「洗白」角色。

原著漫畫嘅「Ancient One」係一位亞裔西藏老人。（圖片截自：comicbook）

近日Kevin Feige接受外媒《Men's Health》訪問，期間提到即將上映嘅《尚氣與十環幫傳奇》同主角劉思慕，就忽然承認當年《Doctor Strange（奇異博士）》做錯決定，坦言「我哋嗰陣以為自己好醒，認為咁樣做會好前衛。我哋只係唔想好刻板印象咁用一位亞裔年老男性演員出演Ancient One。」「至於有冇方法搵亞裔演員出演又唔會好刻板？係有嘅！」

雖然之前犯嘅錯已經無法改變，但Kevin Feige認為MCU未來會更好，承諾會更加小心咁選角同改編，同時透露《尚氣》就係一個好好嘅契機，認為劉思慕係擔任主角嘅最佳人選。不過，對於Kevin Feige忽然間舊事重提，有粉絲就認為同《尚氣與十環幫傳奇》選角爭議有關，好似間接話畀大家知MCU只係忠於原著，唔知大家又點睇呢？

資料來源：Men's Health、Deadline