繼新垣結衣無預警閃嫁星野源後，最近又傳出另一位人氣女星即將結婚，今次主角係28歲嘅有村架純同埋32歲嘅佐藤健。據日媒《周刊實話》報導，近日二人出席電影《浪客劍心最終章The Final》宣傳活動期間互相傳情，猶如熱戀情侶，猜測二人正打得火熱，可能隨時閃婚。

（圖片截自：oricon）

近日有村架純孖著佐藤健出席電影《浪客劍心最終章The Final》宣傳活動，期間有村表示只要有佐藤在場，佢就會好安心。而佐藤就表示有村帶有神秘氣質，令佢好想了解有村更多。加上佐藤健喺上年3月曾表示同有村架純合作就好似發夢一樣，從未度過咁美好同夢幻嘅時光。令日媒猜測兩人一早祕密「撻著」，有可能隨時結婚。

《浪客劍心最終章The Final》劇照。

日前佐藤健就同老友「ONE OK ROCK」主唱Taka上電節目大談結婚大事，Taka表示自己有時想結又有時唔想結婚，但就希望可以有小朋友，更提起當年同佐藤出席三浦翔平婚禮嗰陣，兩個大男人同時感動到爆喊。佐藤就聲稱自己正為事業拼搏，暫時唔得閒結婚。不過依家都係得個傳字，唔知信邊個好，所以大家又唔使咁擔心嘅，當叫做有個心理準備。