無論大至國際運動賽事，小至大家中學時期嘅陸運會，都會有啦啦隊出現，除咗可以為場上一眾選手呐喊助威，更可以炒熱現場氣氛。今日介紹嘅台灣美女Yuri（陳怡叡），就係中華職棒樂天桃猿專屬啦啦隊成員，相信選手們見到佢幫自己打氣，投球都大力啲。

今年25歲嘅Yuri，讀大學嗰陣為咗一圓跳唱歌手夢想，從南部轉學考到台北打拼，當時除咗讀書之外又要兼顧打工同女團訓練，亦同公司簽咗約所以冇得私自接廣告賺吓外快，捱得非常辛苦，不過最可惜就係隊女團最終未能成功出道，好似所有努力都前功盡廢。不過皇天不負有心人，女團解散後Yuri就去咗跳啦啦隊，漸漸開始有收入同曝光率，後來因為參與台灣職棒球隊「統一獅」平面廣告拍攝而得到賞識，獲邀加入旗下專屬啦啦隊，之後喺2019年再轉到現時嘅樂天桃猿專屬啦啦隊「Rakuten Girls」。

Yuri除咗擔任啦啦隊成員同平面Model之外，近年更積極進軍演藝圈，喺上年就出演《練愛iNG》、《哈囉少女》、《刻在你心底的名字》多部台灣電影。當中嘅《哈囉少女》更有親熱戲份，Yuri曾表示為咗拍好嗰場戲，特登上網睇「片」學習點樣叫先會好聽啲，咁敬業樂業的確值得尊敬！