唔經唔覺，原來2001年7月20首映嘅《千與千尋》，距離依家差唔多成20年，仲記得當年腦囟未生埋嘅我其實睇唔明套戲講緊乜，只知道入面啲角色千奇百怪好有趣，直至近年喺Netflix重溫返先明白到呢部電影嘅魅力。為慶祝電影問世20周年，最近吉卜力工作室就以經典角色制作出「無臉男錢罌」，唔只得個樣，仲要識郁識發聲。

對《千與千尋》有印象嘅朋友，應該記得無臉男本身係一個存在感極低嘅邊緣人，後來油屋員工知道佢識變出黃金而當財神咁招待，不過就因為千尋唔受金錢所誘惑，令佢非常憤怒，不停食人填滿內心嘅空虛。

但今次呢件嘅無臉男就唔係食人，而係食錢！只要你將硬幣放喺嗰碟上，無臉就會舉起隻碟將所有硬幣放晒入口，吞完仲會發出打嗝聲。另外，佢右手捉嘅青蛙員工亦都還原返電影場景，如果大家唔鐘意，可以附送嘅魚替換。

「無臉男錢罌」容量約100個日本10元硬幣，高21cm，目前已於吉卜力工作室官方專賣店橡子共和國開發預訂，預計7月下旬出貨，售價為6,380日圓（約$420港幣）。

資料來源：橡子共和國