人氣動漫《鋼之鍊金術師》係大部份人嘅童年回憶兼神作，當中有唔少經典場面事隔多年仍然記憶猶新，不過講到最痛心一幕，莫過於係小妹妹妮娜變成合成獸，對住愛德華輕輕道出「愛德華...大..哥哥」。最近有日本網友就發現有外國網站竟然惡搞呢一幕，「二創」咗件T-Shirt，令粉絲們忍唔住口大鬧「冇人性！」

從網站圖片截圖可以見到，T-Shirt上印有一個充滿諷刺性嘅圖案，妮娜同狗仔阿歷山大企喺鍊成陣前做出《龍珠》合體動作，不禁令人諗起妮娜被佢阿爸強行鍊成合成獸嘅一幕，有睇過《鋼鍊》嘅朋友就知道呢件衫有幾「地獄」，同時亦有侵犯版權之嫌。

喺《鋼之鍊金術師 FA》入面，愛德華兄弟為咗搵方法復原身體，專程拜訪一位研究合成獸嘅鍊金術師「修·塔卡」，期間兩人同塔卡個女妮娜同寵物狗仔阿歷山大成為好朋友。點知塔卡為咗製造出可以講人話嘅合成獸，而將妮娜同阿歷山大鍊成為一隻半人半狗嘅合成獸。當隻合成獸對愛德華輕輕道出「愛德華...大..哥哥」嗰陣，相信每位觀眾都會永遠記得嗰一幕有幾咁衝擊同震撼！點都估唔到竟然會有人用呢一幕嚟惡搞仲要出埋T-Shirt。

資料來源：はちま起稿、redbubble