當提到《Red Dead Redemption 2》呢款遊戲，好多機迷都對佢嘅沉浸式體驗讚不絕口，玩家可以喺遊戲入面打獵、釣魚、搶劫、騎馬兜風等等。最近外國有位YouTuber就將沉浸式元素提升到另一個層次，用電動活塞整咗張「震動電腦枱」模擬騎馬真實體感，只要隻馬一郁，張枱就會跟住一齊震。

從YouTuber「Teenenggr」嘅製作影片可以見到，佢首先將4個電子活塞駁入電腦，寫咗個程式匹配馬匹動作嘅，再將活塞安裝喺枱腳。起初仲因為震得太勁，差啲連個Mon同鍵盤滑鼠都飛埋落地，最後用牛皮膠紙黐實先冇事。雖然呢個裝置明顯係純屬搞笑，要整都應該整震動椅先啱，但網友們見到佢咁有創意，都忍唔住畀個Like佢。

查實呢個YouTuber唔係第一次發明啲咁有「創意」嘅裝置，之前佢就整過「後座力滑鼠」，透過Python讀取滑鼠嘅開槍指令，再將信號傳送到Arduino驅動一系列螺線管（Solenoid），達到模擬開槍後座力嘅效果。而且佢每次都會將相關發明嘅Code分享畀大家參考，至於有冇人會跟住整就不得而知。