喺香港，OT並唔係一件罕見嘅事，但日本嘅OT情況比起香港就要嚴重得多。日本厚生勞働省近日就發佈上個財政年度 (2020年4月到今年4月)嘅「違法超時工作報告」，發現有37%日本公司有違法OT嘅情況，嚴重者要員工每日OT近七個鐘。

圖片：pakutaso

日本厚生勞働省去年調查24,042個日本工作地點，發現其中8,904個有違法OT嘅情況出現。所謂「違法OT」即係員工合約並無要求超時工作，又或員工實際OT時數比合約列明要多。涉及違法OT嘅工作地點中，有近3,000間要求員工每月超時工作80小時，除返每個月大約22個工作日，即係平均每日OT三個幾鐘；另外有419個工作地點要求員工每月超時工作150小時，即係每日要OT將近七個鐘，基本上同返兩份工冇分別。

圖片：pakutaso

報告一出，就連「習慣」OT嘅日本網民都覺得驚訝。不過睇返過去數字，其實日本嘅OT情況已經有所改善。首先，厚生勞働省係因為接到投訴，又或者懷疑有問題先去調查呢二萬幾個工作地點，所以整個日本嘅OT情況應該會比報告好啲；另外「37%工作地點有違法OT」都已經係自2016年厚生勞働省公佈數字以來最低，證明日本OT情況或者已有改善。