據外國傳媒指，任天堂即將為踏入三週年嘅「Switch Online」，加入Game Boy及Game Boy Color年代遊戲，亦即係大家有望用Switch玩返Pokemon 紅藍綠黃版等經典遊戲。

「Switch Online」係任天堂於2018年9月推出嘅線上服務，其中一個賣點就係訂閱者可以用內置模擬器免費玩返「紅白機」以及「超任」年代推出嘅遊戲。而早在2019年，就有外國網民發現個模擬器程式中，有兩名為「Hiyoko」及「Count」嘅不知名模擬器，當時就已經估可能係用黎玩GB及/或GBC嘅遊戲。

上月尾外國遊戲Podcast 「Nate the Hate」就再次指，任天堂會於短期內將GB 及 GBC加入Switch Online。然後就吸引到歐洲遊戲情報網站《Eurogamer》追訪，並於日前指有另一個消息來源證實相關消息，而且仲話唔止GB及GBC嘅遊戲，甚至連「其他舊遊戲平台」都可能會登陸GB/GBC。

呢個消息對於一眾「老機迷」黎講當然令人興奮，但要潑一潑大家冷水嘅係，任天堂目前對於Switch Online上紅白機及超任遊戲嘅更新速度非常緩慢，開咗就黎三年，目前兩個平台加埋都係得百令隻Game，可以想像就算真係有埋GB及GBC遊戲，大家都可能要等一段時間先玩到自己嘅心儀作品。不過又咁講，有希望都好過冇希望呀嘛？

資料來源：Nate The Hate、Eurogamer