由韓國工作室SHIFT UP開發嘅PS5遊戲《Project EVE》，日前於「PlayStation Showcase 2021」發布會上正式公開首條預告片，雖然發售日期同售價都尚未公布，但就因為打鬥動作華麗及女主角造型性感而引起唔少關注。為慶祝呢件開心事，最近SHIFT UP就向全公司260位員工每人送一部PS5當作賀禮，一齊分享喜悅。（唔使問點解啦，我都好想知佢點樣搵咁多部PS5返嚟！）

據外媒VGC報導，日前韓國知名繪師兼「SHIFT UP」CEO金亨泰為慶祝公司第一款主機遊戲《Project EVE》即將登陸PS5，以及員工們可以好好享受自家遊戲，決定向每位員工送一部PS5，並透過內部電郵向表達謝意「衷心感謝所有努力工作嘅員工，我哋一定可以凝聚力量製作出一款偉大遊戲，為全世界玩家帶嚟驚喜。」

《Project EVE》係一款動作冒險遊戲，故事背景設定於近未來，講述人類遭到名為「NA:tives」嘅侵略者入侵而被逐出地球，為奪回地球，玩家將會扮演女主角EVE以殖民地空降部隊生還者身份，同新戰友一齊對抗強大敵人。