由Tom Hanks主演嘅科幻電影《Finch》正式公開首條預告，故事背景設定於末日後地球，講述工程師主角Finch（Tom Hanks飾）知道自己命不久矣，為咗死後有人可以照顧愛犬，於是製作咗一隻機械人，從此三「人」展開一場末日之旅，預計今年11月5日於Apple TV+上映。

劇情講述地球遭到太陽風暴影響發生毀滅性天災，身患重病嘅Finch成為少數倖存者之一，並同愛犬Goodyear相依為命喺地下基地將近10年。隨住健康狀況逐漸變差，Finch決定製作咗一隻機械人Jeff幫忙照顧Goodyear，同時因為風暴即將來襲，佢哋必需馬上動身尋找新庇護所，於是三「人」就喺危機四伏嘅廢土上展開一場末日旅程，探討生命意義。

電影由《Repo Men（獵捕者）》導演Miguel Sapochnik執導，《Back to the Future（回到未來）》三部曲導演Robert Lee Zemeckis擔任監製，Tom Hanks以及Caleb Landry Jones（聲演機械人Jeff）主演。唔知大家覺唔覺得，Tom Hanks加上「孤身一人」呢個背景設定，令人有種《Cast Away（劫後重生）》嘅感覺呢？