早前Daniel Craig 接受訪問時，直稱其主演嘅第二部《007》電影，2008年上映嘅《Quantum of Solace》係「有啲垃圾 (A bit of A shit show)」，背後原因就係因為當年荷里活編劇大罷工令電影故事未經打磨就要拍攝。而十幾年後嘅今日，美國影視界又正在醞釀另一場罷工，唔知對電影及劇集製作又有咩影響？

圖片：IATSE.NET

卻說疫情令荷里活長時間停擺後，近來就有大量拍攝開始進行，再加上多個串流平台紛紛製作自家劇集，令荷里活出現幕後人員短缺情況，換言之現有人員就要面對長時間OT、冇飯鐘、冇假放以及各類健康問題，再加上串流平台製作人員嘅人工比主流電視台嘅要低，於是代表荷里活六萬名攝影師、化妝師以及其他幕後工作人員嘅「國際戲劇舞台從業人員聯盟 (IATSE)」就開始與代表各大片商、平台嘅「電影及電視製作人聯盟 (AMPTP)」講數，但好明顯就講唔掂啦，所以談判就陷入停滯。

圖片：網上圖片

而IATSE嘅會員們日前就進行咗個全民投票，結果喺90%投票率下，有98.7%會員投票付予工會主席Matthew Loeb宣佈罷工嘅權力，亦即係為談判增加籌碼。另外著名影星Ben Stiller、Seth Rogen、Brie Larson等，以及美國導演工會及代表演員、記者、歌手嘅「演員工會-美國電視和廣播藝人聯合會 (SAG-AFTRA)」亦已經公開支持IATSE嘅行動。

至於AMPTP方面亦發出聲明，先係話佢哋都好想達成協議，佢哋都好重視幕後人員們嘅努力，當然亦唔想拍攝工作因為罷工而停滯，「但雙方都需要合力展示出願意妥協及尋求新方法嘅意願」。據知雙方會於美國時間週二早上11點進行視像會議。