由英國傳奇作曲家Andrew Lloyd Webber創作嘅音樂劇《Cats》，就算大家未睇過，都一定聽過佢首經典名曲《Memory》，亦吸引到《Les Misérables（孤星淚）》金獎導演Tom Hooper於2019年改編成真人版電影，但就因為詭異特效而招致海量負評，票房仆直未能回本。事隔兩年，近日Webber接受外媒Variety訪問時依然怒氣未消，狠評電影拍得太爛，嬲到佢要養狗療傷！

Webber向Variety記者苦訴：「電影版《Cats》錯到離晒大譜，佢哋完全唔理解原作打動人心嘅音樂，睇完套戲唯一諗法就係『Oh,God,no.』」為治療心靈創傷，Webber活到70幾歲人第一次出門買狗，佢認為套戲唯一嘅好處，就係為令佢擁有一隻哈威那（Havanese）狗仔。

全球疫情肆虐，居家隔離期間Webber已同狗仔建立出深厚感情，甚至去邊都要帶埋狗仔一齊。其中有次Webber需要飛往紐約工作，於是寫信畀航空公司表示基於心靈受創，必需帶埋狗仔同行。當航空公司要求提交證明文件嗰陣，佢就簡單回覆「可以啊，你去睇下荷里活對我嘅作品《Cats》做咗啲咩？」結果航空公司就批准Webber帶埋狗仔上機，並註明「無須出示醫生證明」。睇嚟航空公司都認同《Cats》電影版拍得好差，非常同情Webber。

2019年上映嘅音樂電影《Cats》由《Les Misérables（孤星淚）》、《The King's Speech（皇上無話兒）》金獎導演Tom Hooper執導，並搵嚟Taylor Swift、James Corden、「《007》M夫人」Judi Dench、Idris Elba等巨星出演，不過就因為「半人半貓」嘅詭異電影特效而招致大量負評，IMDB評分只得2.7/10。唔知點解會咁多負評嘅朋友，可以睇下面條預告片了解一下。