當年橋本環奈憑一張奇蹟美照，被日本網友譽為「千年一遇美少女」，其事務所網站更因為瀏覽量太大一度癱瘓，吸引各大傳媒爭相採訪，咁如果生得似佢又可唔可以一樣咁紅呢？最近日本青少年選美比賽「2022 MISS TEEN JAPAN」結果出爐，今年14歲嘅石川花成功擊敗7,524名參賽者奪冠，除咗生得甜美可愛之外，另外有網友指佢同橋本環奈撞樣，唔知大家有咩睇法呢？

今年14歲嘅石川花嚟自北海道札幌市，身高163cm，目前讀緊初中二年級。日前佢喺「2022 MISS TEEN JAPAN」決賽環節扮演電影《阿拉丁》女主角茉莉公主（Princess Jasmine），一展歌喉唱出日文及英文主題曲獲得評審肯定，脫穎而出登上冠軍寶座。當石川花知道自己勝出嗰陣，即時忍唔住喜極而泣，同時又話比賽結束後最想做嘅事就係食肉，真性情又可愛嘅反應令唔少網友著迷。

結果出爐後，唔少網友都大讚石川花清純可愛，唔知佢可唔可以Keep住紅落去呢？不過依家先得14歲咁後生，日後實大把世界！

橋本環奈、石川花對比圖。