荷里活「重啟」舊作就唔係啲咩新鮮事，至於呢啲重啟作嘅質素呢……反正，最新接受「重啟」嘅就有大家細個一定有睇過嘅經典聖誕喜劇《寶貝智多星 (Home Alone)》，重啟作《Home Sweet Home Alone》亦釋出首條預告。

《寶貝智多星》嘅故事相信大家都好清楚，就係講一個小朋友於聖誕長假期間，被出外旅行嘅屋企人誤留家中，然後遇上有賊入屋，於是要用自製各種機關對抗賊人。而憑最新公佈嘅預告，重啟作《Home Sweet Home Alone》都係跟隨呢個故事大綱，甚至可以話除咗啲演員換咗人之外，同舊作基本上冇分別，啲機關亦冇太太驚喜。難怪預告推出後於Youtube獲得近二萬個Dislike，唔少網民都留言今個聖誕會繼續睇返1990年上映、由麥哥里高堅主演嘅原版。

Archie Yates

《Home Sweet Home Alone》由《Jojo Rabbit (陽光兔仔兵)》小演員Archie Yates主演，其餘演員中最出名嘅大概就係近年為多部動畫電影配音嘅Ellie Kemper。另外早前亦有傳麥哥里高堅會以長大成人後嘅Kevin McCallister客串，預告中亦見到有位姓McCallister，但唔見樣嘅警員。電影會於11月12日於Disney+獨家上映——聖誕節電影唔喺聖誕檔，仲要唔上大銀幕，某程度上都表達咗Disney對電影嘅信心。