鬼才導演昆頓塔倫天奴（Quentin Tarantino），日前出席《第16屆羅馬電影節》獲大會頒發終身成就獎，當然又被問下部作品想拍咩啦！不過佢就表示自己未有頭緒拍乜好，當記者追會唔會拍《Kill Bill 3》嗰時，佢就好快講咗句「Why Not？」。除此之外，日前昆頓接受專訪時亦透過咗唔少下部作品嘅構想...

日前昆頓接受當地Talk Show主持人Fabio Fazio專訪時，就透露下部作品想拍喜劇，入面會包含一啲「意大利式西部片（Spaghetti Western）」元素，每個角色都用唔同嘅語言交流，例如墨西哥強盜係意大利人、主角係美國人、腐敗嘅警長係德國人、墨西哥酒館女郎係以色列人等等。我諗大家都預視到呢部作品應該會充滿黑色幽默，不過佢就冇表明呢套作品係咪「告別作」，或者會以劇集形式呈現。

今年58歲嘅昆頓塔倫天奴，曾經多次公開表示「拍完十部電影就會退休」，目前已經拍咗九部，所以影迷們都非常期待佢嘅封鏡之作。