每當提起VR裝置，唔少人都會諗起打機或睇戲等娛樂用途，相信點都估唔到原來可以同醫療扯上關係。最近生物科技公司Luminopia就宣佈旗下一款VR裝置，成功獲得美國食品藥物管理局（FDA）批准，用於治療兒童弱視問題。

（圖片截自：luminopia）

所謂嘅弱視（又稱懶惰眼）簡單嚟講係指小朋友發育期間，雙眼因為某啲原因導致一隻眼視力好啲，另一隻就差啲，基於大腦會自動集中用視力靠好嗰隻眼睇嘢，久而久之另一隻眼就會退化變成弱視。常見嘅治療方法就係遮住視力靠好嗰隻眼，迫使患者訓練靠弱嗰隻眼。

（圖片截自：luminopia）

近年生物科技公司Luminopia就提出一個新方法，聯同動畫公司Nelvana及Sesame Workshop合作，推出一款專門用作矯正視力嘅VR裝置「Luminopia One」，收錄超過700小時流行影音內容，等患者能夠邊睇戲邊治療。其原理在於患者戴上VR裝置後，兩隻眼會分別睇到唔同嘅影像，視力好嗰隻眼會睇到對比及清晰度較低嘅影像，而視力差嗰隻睇到嘅影像對比度更高更清晰，藉此達到治療達果。

根據Luminopia為期12周嘅臨床實驗顯示，每星期6次，每次睇1個鐘VR片嘅病童，高達62%人視力獲得大幅度改善。相反齋戴矯正眼鏡嘅病童，就只有33%人獲得同樣程度嘅視力改善。