相信大家細個都睇過經典聖誕喜劇《寶貝智多星 （Home Alone）》，劇情講述一個小朋友聖誕假期間獨留家中，自製各種機關對抗入屋偷嘢嘅賊人。最近LEGO IDEAS系列就出咗一款同名作品，還原劇中多個機關以及經典場面。

「21330 Home Alone」原設計，由Alex Storozhuk創作。

LEGO一向鼓勵各位發揮創意，自2008年創立LEGO IDEAS網站畀玩家分享設計，並選出具潛力嘅設計量產投入市場。早喺2019年，一位嚟自烏克蘭嘅LEGO迷Alex Storozhuk（網名：adwind）就同大部份人一樣，用LEGO砌出細個嗰陣嘅經典作品並放上LEGO IDEAS開心Share，結果反應非常良好得到大量網友支持，最終被LEGO公司選出並且量產，成為今日介紹嘅「21330 Home Alone」。

今次呢次作品總共由3,955塊零件組成，組裝完成後高27cm、長37cm，大宅嘅正面同屋頂都可以掀開，觀賞每個間房嘅裝潢。除咗大宅本體之外，同時附上賊人所駕駛嘅貨Van以及電影入面嘅樹屋。我Cap咗幾張電影截圖，唔知大家仲記唔記得以下經典情節呢？

「21330 Home Alone」 售價為US$249.99（約HK$1,940），預計11月1日於美國LEGO官網發售。