日前橋本環奈接拍電子漫畫網站「BookLive!」廣告，一邊唱出洗腦主題曲，一邊做迷之手勢。點知咁啱得咁橋，個甫士竟然同《賭俠2之上海灘賭聖》入面「我要殺死丁力呢個仆街！」嗰幕極為相似，隨即成為網民熱話。究竟排舞嗰位朋友係點諗出嚟嘅呢？唔通佢有睇開周星馳？

比起橋本環奈上年幫「BookLive!」拍嘅廣告，今次明顯生動得多，除咗依然有洗曲歌曲「マンガ読むならブックライブ～♪」，仲多咗一套迷之手勢，扮揭漫畫又做晒OK手勢咁樣，不過最觸動大家神經嘅嘅莫過於「我要殺死丁力呢個仆街！」甫士。

大家唔好以為呢15秒廣告只係Fing吓手仔咁簡單，橋本環奈喺事後表示套動作一啲都唔易做，都排練試咗好幾次先識，導演甚至作出「高1cm」呢類咁詳細指令。下面就係上一次橋本環奈嘅「BookLive!」廣告，我諗大家應該都鍾意「丁力」版本多啲。