由奧斯卡金像導演趙婷執導、備受全球影迷期待嘅《永恆族（Eternals）》，將於11月3日率先喺港台兩地搶先上映，美國就延遲兩日。由於官方先前多次宣傳劇中將會首度出現同性戀超級英雄，甚至會有男同志接吻戲份，而引起大量網友不滿。唔少人連套戲都未睇，就湧入IMDb及Rotten Tomatoes等影視評論網站留下負評，令IMDb暫時關閉該電影評分功能。

（圖片截自：The Direct）

Marvel Studios主席Kevin Feige早於上年就證實，《永恆族》將會出現MCU首位同性戀超級英雄，而黎巴嫩裔演員Haaz Sleiman亦喺訪問時透露，佢所演嘅角色將會同永恆族成員Phastos（Brian Tyree Henry飾）扮演一對同性戀人，當中更有接吻鏡頭，並表示當日嗰埸戲感動到在場所有劇組人員都流淚。

不過，似乎唔係所有人都滿意Marvel嘅做法。據外媒The Direct報導，隨住電影即將上映，近日影視評論網站IMDb湧現超過400個1星評論（10星滿分），令網站馬上關閉評分功能以示公平，而Rotten Tomatoes亦只錄得60%新鮮度（低於60%就會被視為爛片）。事實上，Marvel先前嘅《Captain Marvel》亦遭受過負評轟炸，但最後都交出亮麗成績，全球大收11億美元票房，而且評論呢樣嘢一向只供參考，要親身睇過先知套戲是好是壞。

資料來源：The Direct、indiewire