雖然喺香港未算好多人玩，但由Epic開發嘅《Fortnite (要塞英雄)》乃係一個目前有3.5億註冊玩家嘅熱門遊戲，仲要未計中國玩家——因為隻Game一直都未能於中國正式推出，近日更加宣佈由2018開始至今嘅Beta Test都會完結，《Fortnite》全面撤出中國市場。

《Fortnite》中國被自2018年7月開始推出，但據業內人士指出，由於隻Game從來都未獲得中國當局批准，所以一直都係以「測試版本」名義運行，並未正式推出，Epic亦冇辦法推出任何付費內容，簡單黎講就即係白做。而且《Fortnite》並非冇努力過，實際上中國玩家玩到嘅「測試版」與「正常版」喺遊戲機制、遊戲貨幣以至人物都有唔同，係Epic為中國市場度身訂造。

但即使用咗咁多人力物力，似乎都係推出無望，於是喺日前宣佈11月15日關閉伺服器。

圖片：截圖自《堡壘之夜》官網

公告中就冇講明退出中國市場嘅原因，但外媒就估計係中國政府近年推出未成年玩家遊玩時間限制等措施，令遊戲市場環境改變，本身都已經冇辦法正式推出兼賺錢嘅《Fortnite》日子將會更加難過，最後唯有認輸離場。

特別嘅係，Epic嘅大股東其實係中國科技巨企兼遊戲界領頭羊騰訊，喺有咁大個「堂口」照顧、再加3年時間都無辦法打入中國市場，或者會令其他遊戲重新考慮進入中國市場？