每當男士們做錯或講錯某啲嘢，大家經常都會講笑咁話返到屋企要跪玻璃、Lego或者Keyboard，但最近有位日本人妻就忽發奇想，將偷去夜總會嘅老公鎖入三層高貓籠20小時作為懲罰。雖然唔清楚人夫嘅心理陰影面積有幾大，不過佢事後就喺貓籠購買網站留下4星好評大讚堅固。

最近有日本網友喺Amazon搜尋貓籠嗰時，搵到一款尺寸為178 x 93 x 63cm嘅三層貓籠，空間大到放幾隻貓咪都唔成問題，仲有位畀佢哋跳嚟跳去打關斗，之不過重點係評論區有位叫「中村」嘅人夫，聲稱自己有日呃老婆要OT，實情就去咗夜總會消遣，結果不慎被老婆斷正鎖咗佢入貓籠受罰。

中村先生半開玩笑咁話：「貓籠做工精良非常堅固，相信無論幾狂野嘅貓咪都冇辦法逃出，而且個籠可以提供夠足且舒適嘅活動空間畀貓咪，畢竟一個成年男人都可以喺入面渡過20小時。呢款產品非常棒，但我唔想再入去，所以只能夠畀4星評分。」

（圖片截自：Twitter@Ryuriu1）

後來呢則留言被轉載到Twitter後引起網友熱烈討論，大致上都係評論緊老婆做法啱唔啱等等，另外有網友嘅著眼點反而係中村究竟係點樣入去，仲要畫晒示意圖估計佢身高只有165cm。

資料來源：Amazon.jp、togetter