由於中國審查制度嚴格，遊戲內容經常被「和諧」都唔係咩新鮮事，隨住任天堂將於19號推出《寵物小精靈 鑽石／珍珠》重製版《晶燦鑽石／明亮珍珠》，最近微博就有傳簡體中文版本唔少含有「殺」、「鬼」、「死」、「血」字眼嘅技能名都通通被「和諧」，其中最有特色莫過於「搶奪」被改成「化為己用」...

圖片截自：微博

據一位擁有183萬Fans嘅微博主消息，即將登場嘅Switch遊戲《寵物小精靈 晶燦鑽石／明亮珍珠》簡中版本，唔少經典技能名稱都慘遭和諧，例如「自爆」變成「玉石俱碎」、「欺詐」變成「移花接木」、「鬼火」變成「磷火」、「鬼面」變成「可怕面孔」等等，從以上一系列被和諧嘅技能名可以發現，應該凡係有鬼、死、殺、地獄..etc等「敏感」字嘅技能都要重新命名。

事實上，《寵物小精靈》中國官方喺2020年嗰陣就曾經修改部份Pokemon簡中譯名（繁中不受影響），將「流氓熊貓」變「霸道熊貓」、「死神板」變「迭失板」等。雖然要開賣先知單消息係咪真，但最後啲技能係咪真係改名，對於玩開繁中或日版嘅大家嚟講，應該就冇咩影響嘅。