早前同大家提及過，今年12月上映嘅《Spider-Man：No Way Home（蜘蛛俠：不戰無歸）》係Tom Holland合約期滿最後一部作品，而佢自己都話唔想拍到30歲仲演緊蜘蛛俠，打算試下新戲路。之不過呢，日前《蜘蛛俠》監製Amy Pascal向傳媒透露，Sony Pictures同Marvel Studios計劃製作全新三部曲，仲預埋Tom Holland添！

據多間外媒報導，日前MCU版蜘蛛俠三部曲監製Amy Pascal接受售票網站「Fandango」訪問時，透露《No Way Home（不戰無歸）》並非Sony同Marvel最後一部合作嘅蜘蛛俠電影，佢哋正準備同Tom Holland及Marvel製作下一部，甚至全新嘅蜘蛛俠三部曲。

另一邊廂，早前Tom Holland接受時尚雜誌《GQ》專訪時就話過唔想永遠都做蜘蛛俠，希望嘗試其他戲路「如果我30歲後仲扮演緊蜘蛛俠，咁我就真係做錯喇。」加上Sony同Marvel都未有正式宣布《蜘蛛俠》後續計劃，所以Tom Holland係咪會添食再拍多三部仍然係未知之數，唔知大家又想唔想佢繼續飾演蜘蛛俠呢？