自從疫情開始之後，唔少人都或自願或被逼留在家中，外賣APP就成為唔想煮飯嘅人最方便嘅選擇。但外賣APP之間嘅競爭令經營變得非常困難，而Uber Eats就於今日宣佈，會於今年12月31日晚上11點59分終止服務，成為第一個敗陣嘅外賣APP。香港嘅外賣APP由「三強鼎立」變成「二虎相爭」。

據Uber Eats於公告所說，終止香港地區服務係一個「艱難的決定」，「我們目前的首要任務是為員工、送餐人員、合作餐廳及顧客提供支援 ── 全賴他們的努力和信任，我們才能建立為港人送上美食的外送平台。在此，Uber Eats 衷心感謝各位的支持」。並無交待終止服務嘅原因。

公告下半就表示公司會專注於Uber服務，「全力拓展 Uber 全球最大的 Uber Taxi 市場」。

值得一提嘅係，今次Uber Eats終止服務似乎係一個幾突然嘅決定，回顧今年四月Uber Eats香港區總經理Elisa Janiec接受媒體訪問時，仲講緊希望2022年4月將服務範圍擴展至全港，今年7月Uber Eats搵黎欣宜及許廷鏗拍攝廣告，去到9月又推出咗AGA同Jace嘅新宣傳活動，貼到成個尖沙咀站都係。