過往我哋同大家分享過唔少性愛研究，都指「新意」係提升性愛體驗嘅要點之一，咁除咗換個新對象、搵啲新姿勢之外，喺Staycation盛行之下，「換個新地方」大概就係最易搵到嘅「新意」之一。不過Staycation兩年咩都悶啦係咪？美國有公司就推出包機服務，等大家可以「爆機」做到上天！

美國拉斯維加斯公司「Love Cloud」提供包機服務，供大家舉行空中婚禮、空中浪漫晚餐之類嘅情侶活動。但佢哋好明顯知道，情侶活動唔一定「發乎情止乎禮」，所以就推出埋「Mile High Club Flight」服務，只需995美金 (約HK$7750) 就可以，就可以於擁有浪漫佈置、雙人大床、航行於一英里高空嘅飛機上享有45分鐘私人時間，期間大家喺機入面做咩都冇人過問。嫌45分鐘有啲太趕？佢哋嘅「雙鐘」服務仲只需1495美金 (約HK$11650)添！

冇錯，簡單黎講呢個「Mile High Club Flight」就係一個空中爆房——準確啲講，「爆機」——服務。網站介紹寫到明機師與乘客區之間會有門簾，而機師亦會戴上降噪耳機，你哋玩到有幾大聲佢都 (理論上) 聽唔到，明顯係預咗乘客會喺機上翻雲覆雨。落機後仲會向乘客頒發VIP證書，同影返張合照以紀錄你哋嘅歡樂時光。萬令蚊飛上天搞個嘢，唔知大家有冇興趣？

資料來源：Love Cloud