由古天樂、劉青雲、劉嘉玲、謝君豪、姜皓文及張家輝多位巨星主演，耗資逾4億港幣拍攝嘅香港科幻電影《明日戰記》終於有新消息！今日古仔就喺個人Instagram貼出一段時長9秒嘅宣傳片段，並問大家「Are you ready？#staytuned。」我諗影迷們唔只Ready好晒，仲一早等到頸都長埋！

View this post on Instagram

A post shared by 古天樂 Louis Koo (@kootinlok_louis)

今日古仔突然喺IG貼出一條9秒鐘嘅短片，展示出一個神秘Logo同一部機械人，期後有份參演嘅姜皓文、劉嘉玲、胡子彤、朱鑑然亦齊齊喺IG分享相關片段，其中有個版本更出現疑似外星異種模樣，似乎暗示緊早喺2017年煞科嘅《明日戰記》終於要上映喇！

《明日戰記》由曾經憑《鬼域》、《投名狀》以及《風雲II》三奪港電影金像獎最佳視覺效果嘅吳炫輝執導，故事背景設定於2055年，講述地球受到具攻擊性嘅外星異種藤蔓「潘朵拉」入侵，空氣以及水源均受污染，古天樂及劉青雲等倖存人類為生存而同「潘朵拉」決一死戰，另外更要面對張家輝所講嘅「天幕計劃」謎團。