IKEA嘅裝潢風格向來備受歡迎，甚至係唔少人理想安樂窩嘅模樣。最近丹麥有間IKEA嘅員工及客人，就因為一場暴風雪而有機會喺店內過夜及用餐，深入體驗IKEA床褥及家具，仲Chill到用大型Projector睇聖誕電影。

（圖片截自：insider）

據BBC報導，日前丹麥北部遭受暴風雪吹襲，其中奧爾堡市（Aalborg）積雪更高達30cm，當地警方為安全起見亦呼籲民眾唔好揸車，結果令20多名IKEA員工及6名顧客滯留於店內。該分店經理Peter Elmrose就決定開放展示廳，任由大家使用入面嘅床、梳化以及其他家具。

除咗提供床鋪之外，一眾IKEA員工及顧客更喺餐廳一齊食飯、玩Board Game、用大型Projector睇波同睇聖誕電影，非常寫意。另外，Peter Elmrose亦強調喺隔日開店之前，員工們已經換過晒所有床單及床上用品，確保乾淨衛生。