只要一套動漫夠經典，唔使啲咩新長篇，只要不停出週邊，再加久唔久一套半套劇作版其實就夠養起成村人。唔信？你睇下《龍珠》！？

至於下一套有資格步向呢種好聽啲叫「經典之作」，難聽啲叫「死唔斷氣」地位嘅作品，應該就係《火影》啦！之前電影版《火影忍者The Last》喺日本上映兩日就收5億Yen(約3200萬港元)，轉個頭作者岸本就話會出續篇電影。近期就公佈埋第一張宣傳圖同上映時間添！

電影由岸本本人擔任原作、人設、腳本兼製作總指揮，質素係有一家保證。問題係當年《龍珠》意圖用悟飯接棒，都要先整死悟空，起碼限制悟空出場時間；依家大大個嗚人「得」係到，仲係故事中不可或缺嘅「火影」，慕留人係咪真係接到棒呢？定係會成為另一個「飛鳥真」被「鳴門大魔王」搶走個主角位呢？

電影8月7日於日本上映。但4月27日岸本就會開始連載外傳漫畫《七代目火影と緋色の花つ月》，據說都係以慕留人同紗羅妲做主角，仲同電影有關聯添！咁就等我哋放長雙眼睇下岸本點畫啦！