仲有幾日就到聖誕節，唔知大家準備好去邊度玩、食咩、送咩未呢？喺日本，每年情人節同聖誕節前夕都會有班自稱不歡迎嘅人組成「去死去死團」，舉晒Banner上街遊行高呼「反對戀愛資本主義」、「粉碎聖誕節」，呼籲大家唔好落入商家嘅圈套！日前佢哋就再次出動，喺澀谷街頭發起抗議，並邀請志同道合嘅途人加入。

呢個名為「革命的非モテ同盟（革非同）」嘅民間組織，自2006年起每逢情人節、聖誕節都會去到著名嘅約會地點遊行，每次規模大約10-20個人左右，高呼各種口號呼籲大眾唔好陷入戀愛資本主義，助長商家喺節目牟取暴利以及剝削員工。就喺上個禮拜日（19日），「革非同」就去咗著名約會地點澀谷遊行，即使當時氣溫只得個位數仍然堅持宣揚自己嘅理念。

據「革非同」官網介紹，呢個組織之所以會出現，係緣於創辦人兼終身名譽總書記古澤克大，喺2006年同心儀女仔表白時慘食檸檬，返屋企研讀《共產黨宣言》後得到啟發，於是就成立咗「革命的非モテ同盟」。有趣嘅係，古澤克大N年前已經退咗團（可能去咗拍拖？），目前組織係由擁有相同理念嘅成員傳承落去。