隨住近年NFT加密藝術迅速興起，吸引藝術家及各界名人紛紛加入，日本音樂巨匠坂本龍一亦唔例外，佢日前就將今年唯一現場演奏作品《Merry Christmas Mr. Lawrence - 2021》全曲595個音符，分別鑄成595個NFT出售，每個售價為1萬日圓，結果反應非常熱烈，搞到銷售平台一度死機。

圖片截自：adam.jp

有「新音樂教父」之稱嘅坂本龍一，一生獲獎無數，曾經憑《末代皇帝溥儀》配樂取得第60屆奧斯卡最佳原創音樂獎，早期亦同過David Bowie合演電影《戰場上的快樂聖誕》，其同名配樂《Merry Christmas, Mr Lawrence》更係佢生涯代表作之一。

坂本龍一今次首推嘅NFT作品，正正就係今年7月錄製，同時係今年唯一現場演奏作品《Merry Christmas Mr. Lawrence - 2021》當中嘅右手演奏部份。將歌曲嘅96個小節595個音符分別鑄成NFT分批出售，成功購買NFT嘅客人將會經Email收到《Merry Christmas Mr. Lawrence - 2021》完整錄音，以及該音符所在嘅樂曲線譜圖片。結果反應相當熱烈，原定21號晚出售嘅首批190個音符，因為銷售平台太多人瀏覽搞到死機，而需順延至22號發售，若然所有音符全數賣出嘅話，收益可達40萬港幣。