各位滿意目前嘅工作嗎？如果可以重新選擇，你又會唔會入返呢一行？早前有日本人力資源公司就以「重活一次想從事的職業」為題，訪問咗4000名16至60歲嘅民眾，結果顯示Z世代（16-25歲）最想做嘅並唔係大眾眼中高薪厚職嘅醫生、公務員或工程師，反而係幾乎冇入行門檻嘅YouTuber，同時認為錢比健康及家人更重要，引起網友熱議！

據《東京新聞》報導，人力資源公司「スタッフサービス・ホールディングス」喺上年9月以年齡劃分成「Z世代（16-25歲）」、「千禧世代（26-40歲）」、「就職冰河期世代（41-50歲）」以及「泡沫經濟世代（51-60歲）」4組，每組各訪問1000人，詢問佢哋如果人生可以重活一次，會希望從事乜嘢職業。結果顯示Z世代（16-26歲）最希望成為YouTuber，其次係藝人或Model，而另外三組人（即26-60歲）嘅意向就大同小異，都係IT工程師、程式員、醫生、公務員等高薪厚職嘅隱定工作。

除此之外，調查機構亦訪問咗大家「人生最重要的東西」，結果顯示Z世代最重視嘅係「錢」、千禧世代及泡沫經濟世代係「家人」，而就職冰河期世代就認為係「健康」。唔知大家對呢個結果有咩睇法呢？