去年7月上映嘅《黑寡婦（Black Widow）》，儘管全球收得3.79億美元票房，但同其他MCU電影仍然有一大段距離。唔少人就將原因歸咎於迪士尼嘅戲院/Disney+同步上映政策，導致上映當日即有4K畫質盜版瘋傳，嚴重打擊票房收入。最近有外媒就估計，盜版至少令《黑寡婦》損失6億美元。

據外媒Deadline報導，《黑寡婦》上映首周後票房急跌68%，創下MCU電影票房最大跌幅紀錄。而電影上映當日，4K畫質盜版更加傳遍全球，截至上年8月底共錄得超過2,000萬次盜載，若以Disney+「Premier Access」收費US$29.99計算的話，估計票房至少損失6億美元。難怪當時主演Scarlett Johansson會起訴迪士尼，不過最終雙方傾掂數達成和解唔使打官司。

如今迪士尼亦都學精咗，決定新戲會率先喺戲院上院，相隔至少45日後先上架到串流平台Disney+，就好似上年11月嘅上映嘅《永恆族》，即將喺今個月12日上架Disney+。順帶一提，目前華納唔少大作仍採用戲院/HBO Max同步上映政策（例如《The Suicide Squad》《The Matrix 4》），如果佢哋唔希望被盜版打擊票房，或者可以參考下迪士尼做法。